.
Chrétien de Troyes
§§§§§§§§§§§§§§§§§§§
Érec et Enide
§§§§§§§§§§§§§§§§§§§
1 Li vilains dit an son respit
que tel chose a l'an an despit
qui mout valt mialz que l'an ne cuide ;
por ce fet bien qui son estuide
atorne a bien, quel que il l'ait ,
car qui son estuide antrelait,
tost i puet tel chose teisir
qui mout vandroit puis a pleisir.
Por ce dist Crestiens de Troies
10 que reisons est que tote voies
doit chascuns panser et antandre
a bien dire et a bien aprandre ,
et tret d'un conte d'avanture
une mout bele conjointure
par qu'an puet prover et savoir
que cil ne fet mie savoir
qui s'escience n'abandone
tant con Dex la grasce l'an done.
D'Erec, le fil Lac, est li contes,
20 que devant rois et devant contes
depecier et corronpre suelent
cil qui de conter vivre vuelent.
Des or comancerai l'estoire
qui toz jorz mes iert an mimoire
tant con durra crestiantez ;
de ce s'est Crestiens vantez.
Au jor de Pasque, au tans novel,
a Quaradigan, son chastel,
ot li rois Artus cort tenue.
30 Einz si riche ne fu veüe,
que mout i ot boens chevaliers,
hardiz et conbatanz et fiers,
et riches dames et puceles,
filles de rois, gentes et beles.
Mes einçois que la corz fausist,
li rois a ses chevaliers dist
qu'il voloit le blanc cerf chacier
por la costume ressaucier.
Monseignor Gauvain ne plot mie,
40 quant il ot la parole oïe.
" Sire, fet il, de ceste chace
n'avroiz vos ja ne gré ne grace.
Nos savomes bien tuit piece a
quel costume li blans cers a :
qui le blanc cerf ocirre puet
par reison beisier li estuet
des puceles de vostre cort
la plus bele, a que que il tort.
Maus an puet avenir mout granz,
50 qu'ancor a il ceanz .v.c.
dameiseles de hauz paraiges,
filles de rois, gentes et sages ;
n'i a nule qui n'ait ami
chevalier vaillant et hardi,
don chascuns desresnier voldroit,
ou fust a tort ou fust a droit,
que cele qui li atalante
est la plus bele et la plus gente. »
Li rois respont : " Ce sai ge bien ,
60 mes por ce n'an lerai ge rien,
car parole que rois a dite
ne doit puis estre contredite.
Demain matin a grant deduit
irons chacier le blanc cerf tuit
an la forest avantureuse ;
ceste chace iert mout mervelleuse. »
Ensi est la chace atornee
a l'andemain, a l'anjornee.
L'andemain, lués que il ajorne,
70 li rois se lieve et si s'atorne,
et por aler an la forest
d'une corte cote se vest.
Les chevaliers fet esvellier,
les chaceors aparellier ;
lor ars et lor saietes ont,
an la forest chacier s'an vont.
Aprés aus monte la reïne,
ansanble o li une meschine ;
pucele estoit, fille de roi,
80 et sist sor un boen palefroi.
Aprés les siust a esperon
uns chevaliers, Erec a non ;
de la Table Reonde estoit,
an la cort mout grant los avoit ;
de tant com il i ot esté,
n'i ot chevalier si loé,
et fu tant biax qu'an nule terre
n'estovoit plus bel de lui querre.
Mout estoit biax et preuz et genz
90 et n'avoit pas .xxv. anz ;
onques nus hom de son aage
ne fu de si grant vaselage.
Que diroie de ses bontez?
Sor .i. destrier estoit montez ;
afublez d'un mantel hermin,
galopant vient tot le chemin ;
s'ot cote d'un diapre noble
qui fu fez an Costantinoble ;
chauces de paile avoit chauciees,
100 mout bien fetes et bien tailliees ;
et es estriés afichiez,
uns esperons a or chauciez ;
n'ot avoec lui arme aportee
fors que tant seulemant s'espee.
La reïne vint ateignant
au tor de la rue poignant.
" Dame, fet il, a vos seroie,
s'il vos pleisoit, an ceste voie.
Je ne ving ça por autre afere
110 fors por vos conpaignie fere. »
Et la reïne l'an mercie :
" Biax amis, vostre conpaignie
aim je mout, ce saichiez de voir ;
je ne puis pas meillor avoir. »
Lors chevalchent a grant esploit,
an la forest vienent tot droit.
Cil qui devant erent alé
avoient ja le cerf levé ;
li un cornent, li autre huient ;
120 li chien aprés le cerf s'esbruient,
corent, angressent et abaient;
li archier espessemant traient.
Devant ax toz chace li rois
sor un chaceor espanois.
La reïne Ganievre estoit
el bois qui les chiens escotoit,
lez li Erec et sa pucele
qui mout estoit cortoise et bele ;
mes tant d'ax esloignié estoient
130 cil qui le cerf levé avoient
que d'ax ne pueent oïr rien,
ne cor ne chaceor ne chien.
Por orellier et escouter
s'il orroient home parler
ne cri de chien de nule part,
tuit troi furent an .i. essart,
anz en .i. chemin, aresté.
Mes mout i orent po esté,
qant il virent un chevalier
140 venir armé sor .i. destrier,
l'escu au col, la lance el poing.
La reïne le vit de loing ;
delez lui chevalchoit a destre
une pucele de bel estre ;
devant ax, sor .i. grant roncin,
venoit uns nains tot le chemin
et ot en sa main aportee
une corgiee an son noee.
La reïne Guenievre voit
150 le chevalier bel et adroit,
et de sa pucele et de lui
vialt savoir qui il sont andui.
Sa pucele comande aler
isnelement a lui parler :
" Dameisele, fet la reïne,
ce chevalier qui la chemine
alez dire qu'il vaigne a moi
et amaint sa pucele o soi. »
La pucele vet l'anbleüre
160 vers le chevalier a droiture.
Li nains a l'ancontre li vient
qui sa corgiee an sa main tient.
" Dameisele, estez! »,fet li nains
qui de felenie fu plains.
" Qu'alez vos ceste part querant?
Ça n'avez vos que fere avant.
-Nains, fet ele, lesse m'aler :
a ce chevalier voel parler,
car la reïne m'i anvoie. »
170 Li nains s'estut enmi la voie,
qui mout fu fel et de pute ere.
" Ça n'avez vos, fet il, que fere.
Alez arrieres! N'est pas droiz
qu'a si boen chevalier parloiz. »
La pucele s'est avant trete,
passer volt oltre a force fete,
que lo nain ot an grant despit
por ce qu'ele le vit petit.
Et li nains hauce la corgiee,
180 quant vers lui la vit aprochiee ;
ferir la volt parmi le vis,
mes cele a son braz devant mis ;
cil recuevre, si l'a ferue
a descovert sor la main nue ;
si la fiert sor la main anverse
que tote an devint la mains perse.
La pucele, quant mialz ne puet,
voelle ou non, retorner l'estuet ;
retornee s'an est plorant,
190 des ialz li descendent corant
les lermes contreval la face.
La reïne ne set que face,
quant sa pucele voit bleciee ,
mout est dolante et correciee.
" Hé! Erec, biax amis, fet ele,
mout me poise de ma pucele
que si a bleciee cil nains.
Mout est li chevaliers vilains,
quant il sofri que tex fauture
200 feri si bele criature.
.
Tags associés :
vers
J'kaz !
0
